Responsables dos catro concellos, acompañados de elementos da Capitanía de Tui, realizaron a ruta fluvial, confirmando as condicións de navegabilidade do río Minho e a viabilidade futura desta ruta turística.
Dentro do proxecto “Río Miño: Un destino navegábel”, este verán porase en marcha o itinerario fluvial do Río Miño Internacional, que permitirá ao público gozar desta ruta natural e patrimonial entre as Eurocidades Valença-Tui e Monção-Salvaterra de Miño. Os concellos lanzarán un concurso internacional para o aluguer dunha embarcación fluvial con capacidade para 20 prazas, así como doutros medios de transporte terrestre, con vistas a realizar rutas turísticas entre os catro municipios fronteirizos.
Esta acción, apoiada polo Programa de Cooperación Transfronteiriza España-Portugal (POCTEP), INTERREG V-A 2014-2020, ten como obxectivo relanzar o turismo local e potenciar o sector económico, co obxectivo de promover os principais recursos e atractivos turísticos desta rexión transfronteiriza.
Co fin de comprobar a viabilidade futura desta ruta fluvial, que contribuirá ao reforzo da oferta turística da rexión, os responsables dos catro concellos bañados polo río Miño, acompañados de elementos da Capitanía de Tui, realizaron un paseo fluvial internacional a semana pasada.
Na “subida” do río, participou o Alcalde de Tui, Enrique Cabaleiro, a concelleira, Yolanda Rodriguez, a alcaldesa de Salvaterra de Miño, Marta Valcárcel, o concelleiro de Turismo de Monção, João Oliveira, e o concelleiro de Turismo de Valença, Mario Rui. O trazado tamén permitiu confirmar as condicións de navegabilidade do río Minho, simulando as condicións reais da futura ruta. Neste sentido, utilizouse a APP Calados Salvaterra (Google Store), que permite coñecer en tempo real o caudal do río e trazar o percorrido ideal.
Coa posta en marcha do proxecto “Río Miño: Un destino navegábel” reforzarase o posicionamento da rexión transfronteiriza, garantindo unha maior centralidade turística, reforzando a capacidade de atracción e visita e monetizando os sectores económicos vinculados á hostalería e restauración.
